الخميس، 25 مارس 2010

ولما كان يوم الثلاثاء

المكان: كلية طب الازهر بدمباط الجديدة
الزمان الساعه 9 صباحا يوم الثلاثاء 16/3
المطلوب: تنظيم معرض عن المسجد الاقصي المبارك وما يتعرض له من مخاطر
الاحداث:
1- طلاب الاخوان يدخلون بخطوات ثابته من البوابة الرئيسية ويفتحون البوابات بهدوء ويتجهون نحو مبني المدرجات
2- اللوحات تصل عبر الطائرات المروحية الاخوانية (يعني من فوق السور عشان المشاكل)
3- طلاب الاخوان يبدأون في تعليق لوحات المعرض والطلاب يتوافدون ويتجمعون استعدادا للمشاركة في المعركة المتوقعه بين زملائهم طلبة الاخوان وعمال وموظفي الكلية المدعومين بحرس الجامعه
4- عمال المدرجات يبدأون في مضايقة طلاب الاخوان ويحاولون منعهم من تعليق اللوحات فيتصدي لهم طلاب الاخوان بهدوء وادب.
5- العمال يبدأون في اجراء الاتصالات بالحرس الجامعي وادارة رعاية الشباب(الحقوا طلبة الاخوان عاملين مظاهرة ومعلقين صور كتير عن الاقصي) والادارة لا تستجيب ويقولون براحتهم من حقهم يعملوا اكتر من كده(علي غير العادة طبعا)
6- احد العمال يجري الي حرس الجامعه ليخبره بالنبا العاجل فيفاجأ برد الامن سيبهم براحتهم يعملوا كل اللي عاوزينه
7- الطلاب مذهولون من تعاون الامن والادارة بسلاسة مع طلاب الاخوان بل ومشاركة بعض الموظفين ودكاترة الكلية في فعاليات المعرض
8- الطلاب يتوافدون بكثرة علي المعرض ويبدأ طلاب الاخوان في شرح ما يتم في الاقصي لهم وسط اهتمام الطلاب وابداء استيائهم وتفاعلهم مع مايحدث في الاقصي واستعدادهم لبذل الغالي والرخيص نصرة للأقصي
9- اذان الظهر يرتفع في مسجد الكلية فيبدألاب الاخوان وطلاب الكلية في التوافد علي المسجد لصلاة الظهر والدعاء في الصلاة من اجل انقاذ الاقصي.
10- طلاب الاخوان يختتمون فعاليات المعرض بكلمة لبيان الواجب العملي علي الطلاب لنصرة الاقصي ويبدأون في جمع اللوحات والانصراف في هدوء دون ان يتعرض لهم احد.
(علي فكرة هذا هو ما حدث في الكلية ولاول مرة يقوم الاخوان بعمل لا يجدوا فيه تعنت من الامن او الادارة لا اعرف هل هي سياسة المرحلة القادمة ام موقف واحد وانتهي؟)

الأربعاء، 10 مارس 2010

ورحل شيخ الازهر






البقاء لله يا جماعه توفي اليوم الي رحمة الله تعالي

الشيخ محمد سيد طنطاوي شيخ الازهر

اثر ازمة قلبية

فاللهم اغفر له زلاته في حق المسلمين واغفر لنا زلاتنا في حقه و عامله يا ربنا بالفضل لا بالعدل

وعزاؤنا الخالص للامة الاسلامية كلها


وانا لله وانا اليه راجعون

الأربعاء، 3 مارس 2010

الحقوني ابويا بقي.... يهودي

طبعا ماحدش مصدق اللي باقوله
لكن والله صدقوا يا جماعه ابويا بقي يهودي واليهود قالولي مالكش دعوه بابوك تاني

لانه خلاص ومن الاخر ...بقي تبعنا

ولاني واثق من ابويا سالته

ايه يا بابا ...هو انت بقيت يهودي ؟؟

.... يا ابويا ما تتكلم .... انت مش راضي ترد عليا ليه

بصلي ورد عليا

وقال .... انا مش ابوك

؟؟؟؟

قلتله :نعم مش ابويا ازاي ...دا انت ابويا وابو الناس كلها

.... دا من غيرك ما كانتش البشرية دي جت ولا شوفناها

ولا حتي سمعنا عن الانبياء كلهم

دا انت ابوهم ...مش ابويا انا لوحدي

دا حتي اسمي علي اسمك

دا احنا في كل صلاة لازم نقول اسمك في التشهد 4مرات

مش ابويا ازاي وانت مذكور في القران

فرد عليا وقال : ما تزعقش كتير ان عارف اني ابوك انما باقي الناس سابوني لليهود

لا حكام بيتكلموا ..ولا شعوب بتسمع ولا تهتم ...كل اللي هاممهم مصر هاتغلب انجلترا ولا لأ ش كده يا يا ابوخليل!!!

(سكت ومارديتش)

فكمل كلامه وقال تعرف تقوللي ايه الدليل اني ابوك بعد ما نسيتوا القران واياته

وللا بعد ما الناس اتقتلوا في المسجد بتاعي ولا انتوا هنا

ولا انتوا فين لما اليهود وصلوا المسجد وداسوا عالارض بالجزم

كنتوا فين ؟؟؟

كنتوا فين لما اليهود شغالين حفر تحت الاقصي وانتوا عمالين تقولوا للبيت رب يحميه واهو خلاص هايقع

كنتوا فين لما اليهود ضربوا غزة بالطيران والدبابات والفوسفور الابيض؟

كنتوا فين لما الحصار شغال ومتواصل علي غزة ومش كده وبس دا انتوا بتساعدوهم كمان وقال ايه احترام السيادة؟؟!!!

وفين وفين وفين

بص يا ابني لما تبقوا تعرفوا تقروا القران ابقوا تعالوا حاربوا اليهود

بصيتله باستغراب

وقلت له: والله باعرف اقرا امال هاصلي ازاي؟

قال: قرات الاية بتاعت اول الاسراء

قلتله: ايوة

قاللي :كام مسجد ذكر فيها

قلت: له اتنين

قال :امال انتوا خلتوه واحد ليه

قلتله: ازاي ؟؟؟؟

قال: فاكرين المسجد الحرام وناسيين المسجد الاقصي لما بتروحوا تحجوا صح؟؟؟

ايوة صح (دا انا باكلم نفسي)

قلتله: طب يا ابويا عايزينك ترجعلنا تاني تبقي بتاعنا احنا المسلمين؟

قال: لما ترجعوا لدينكوا صح وتسيبوكوا من التعاون مع اعدائكوا ابقي ارجع!!

ارجع يا ابراهيم وخلي الناس تفهم دينها صح وتقاطع اليهود صح وتعبد ربها صح هاتلاقيني رجعت

قلتلوا: ان شاء الله يا ابونا ابراهيم قريب وقريب اوي كمان ان شاء لله

(في النهاية دا حور تخيلي دار بيني وبين ابونا نبي الله ابراهيم وهو من واقع ما تم علي ارض فلسطين من ضم مسجد الحرم الابراهيمي الي التراث اليهودي الذي دفن فيه سيدنا ابراهيم واسحاق ويعقوب ويوسف وزوجاتهم عليهم جميعا السلام هذا بالاضافة الي مسجد بلال بن رباح الذي دفن فيه سيدنا بلال بن رباح)
ارجو ان تكون الرسالة قد وصلت ...تماما