كنت في قريتنا اؤدي واجب العزاء
في احد اقاربنا واحد اصدقاء جدي الاعزاء عليه رحمة الله الذي كنت اعزه جدا وأحبه جدا مثله مثل جدي تمام
وشوية قلت استأذن انا والحاج والدي لقيت ابنه بيقوللي استني شوية فيه واحد جاي عاوزك تتعرف عليه
قلت مين ؟
فقال المحامي العام لنيابات ....... احدي محافظات مصر قالللي دا راجل محترم اوي ونفسي تتعرف عليه
بصيت لوالدي وقلنا نقعد نشوف الباشا ووصل الباشا وسلم عالناس واستأذن يصلي المغرب
قلت بس دا باين عليه راجل محترم ومتدين بعد الصلاة اتعرفنا عليه
وبدأ الحوار عن عمله في النيابة وانفلونزا الخنازير قال عنها دي لعبه الحكومة عاملاها عشان
تخلص علي اقتصاد البلد اجي اقول له يا عم بس فيه انفونزا يقول لا انفلونزا ولا حاجه
قلت طب نعدي دي
تطرق الحوار لاحمد زكي بدر وابوه زكي بدر
بصيت لقيت الراجل بيدافع عنهم كأنهم اشرف ناس في الارض
قلتله يا باشا بس ما تنساش اللي عمله احمد زكي بدر في جامعة عين شمس
قال لا ماعملش حاجه دا راجل تربوي وكان بيأدب الطلبه الغير مؤدبين ..
تركته يتكلم عن احمد زكي بدر كيفما شاء ولما انتهي من كلامه
وجدت ترحيب عاصف بكلامه من الفلاحين والجهلة من الجالسين
لانهم لا يعرفو احمد زكي بدر ولا حتي ابوه
فقلت له يا باشا تسمح لي باضافه لكلام حضرتك
قال بكل ذوق اتفضل
قلت له لما هو احمد زكي بدر مؤدب وتربوي وراجل سمعته زي البفته البيضا ..
جاب بلطجية وضرب طلبة جامعة عين شمس ليه ؟
ورفض اضرابات واعتصامات الاداريين والدكاترة؟
بل وحولهم لاعمال ادارية ورفض مقابلتهم ليه؟
اهذا اسلوب تربوي في حل المشاكل؟
ثم لماذا كان يعامل اساتذة الجامعه كانهم عبيد وليسوا اساتذه ؟
ولم يستطع طالب واحد ان يقابله طوال فترة وجوده كرئيس لجامعة عين شمس؟
فابتسم الرجل وقال اكمل
قلتله ايه رايك في زكي بدر بقي ابوه ؟
رد الرجل وقال دا بقه اتعاملت معاه شخصيا وكنت قريب منه
دا كان راجل انساني وراجل مؤدب يكره الظلم ويحب الحق ولو علي رقبته 00
فابتسمت وقلت له طبعا بأمارة الشتايم العلنية للوزرا تحت قبة مجلس الشعب
والاف مؤلفه من قضايا التعذيب في السجون
وخروج اشرف وزراء مصر حسب الله الكفراوي من الوزارة بسببه 0
ساعتها بصييت لقيت الناس في العزا بتبص لي ببحلقة
لان الكلام اغضب الباشا وهو مش عاوز يرد عليا
فنظر لبعضهم فوجدت الردود ان يا دكتور كلام الباشا مظبوط
هو انت عشت ايام زكي بدر قلت لا
قالوا خلاص زي ما الباشا يقول هو الصح
المهم ضحكنا وعدا الموضوع ولكن بقي شئ واحد ان مثل هذا الرجل
(ولا اريد ان يفهمني احد غلط اني اعيب في شخص الرجل
لا والله دا كان راجل في غاية الذوق والادب
بس اقصد ان الرجل استغل منصبه وانبهار الناس به في توصيل فكره وتغيير مفاهيم الناس)
..وامثاله هم من يغيرون ثقافة البسطاء لان البسطاء لا يفقهون في السياسة ولا امور الدولة
وعندهم لما الباشا يقول كله ينفذ لانه لا يريهم الا ما يري
وكلامه مظبوط وما حدش يعارضه لان معارضته عيب
.......اوي
