متفرقات هامة

زوار ماتخافوش الاعزاء

اولا اعتذر عن عدم الكتابة لفترة طويلة نظرا لانشغالي بالكلية وشغلها

ثانيا موضوع النهاردة مش موضوع واحد ولكنه موضوعات متنوعه ومتفرقة ولا تتحمل التأجيل اكثر من ذلك

اولها بعنوان

كلنا عمرو سلامة ... كلنا لسه عايش

بصراحه انا مش عارف ايه الدولة دي اللي خايفة اوي من طالب بكلية الاعلام

وليس في جامعه حكومية ولكن في جامعه خاصة يعني بفلوسه

عمرو سلامة كان طالب بكلية الاعلام جامعة سيناء الخاصة وقدم طلب للتحويل الي جامعة الاهرام الكندية

وتم قبول الطلب وكان تقديره امتياز وهو من الطلاب المتفوقين الواعدين

الذين سيكون لهم مستقبل باهر في عالم الصحافه

فهو اول من صور عملية تهريب الدقيق المدعم بالفيديو

وهو صاحب افضل مدونة في مجال حقوق الانسان وفضح قضايا التعذيب

وتم تكريمه من الشبكه العربية لحقوق الانسان لذلك

كما انه من اوائل المناصرين لغزة ومن المشاركين في المسيرات التضامنية لها

كما انه من اوائل من فضحو الفساد بالصوت والصورة

وهو اول طالب يتم شطبه من قوائم الانتخابات الطلابية في الجامعات الخاصة

بل واكثر من ذلك

فبعد تحويله الي الجامعه الكندية مورست عليه ضغوط

من اجل وقف نشاطاته وتحقيقاته الصحفية المتميزة

فقرر الرحيل مرة اخري الي جامعة سيناء وحينها بدأت مرحلة تصفية الحسابات

فتم رفض طلبه بالرجوع لسيناء فقال ما باليد حيله اروح الكندية

فرفض طلبه وهكذا اصبح عمرو في الشارع ليتم قتل موهبة جديدة في بلد الكورة والعوالم

وهكذا يعلمنا النظام ماهو جزاء المبدعين والمتفوقين والمجتهدين انه ............. الشارع

اذن كلنا عمرو سلامه ........ كلنا لسه عايش

.........................

الموضوع الثاني

احذفوا المسجد الاقصي من القران

- لما صورة للمسجد الاقصي تثير عمداء الكليات ورؤساء الجامعات

وتجعلهم يصدروا قرارات فصل للطلبة وقرارات حرمان من الامتحان ومجالس تأديب

- لما الدولة بجلالة قدرها تقف بعساكرها وامنها عشان تنمع مظاهر ومسيرة للمسجد الاقصي

- لما الدول العربية مجتمعه مش عارفه تتخذ قرار جرئ

بوقف تصدير البترول للغرب حتي يرحل اليهود عن المسجد الاقصي

لما تبقي صلاة العيد حرام عشان لافته مكتوب عليها عيدنا يوم تحرير الاقصي

لما مئات والاف الشباب الطاهر يزج بهم في السجون والتهمة هي مناصرة الاقصي

لما المحاكم العسكرية ومحاكم امن الدولة تحكم علي المدنيين وشرفاء وعلماء الامة

لما يقال ان القران ده للبيت والجامع مش للكلية ولا للحياة

يبقي افضل حل اننا نحذف المسجد الاقصي من القران وكل الناس تستريح بس في النهاية

جهنم وبئس المصير

.................................

اللعبة الخبيثة لكرة القدم

تابعت كما تابع الجميع مباراتا الحسم بين مصر والجزائر

وما صاحبهما من زرع متعمد للحرب والكراهية بين الشعبين الشقيقين

وسألت سؤالا

لماذا كل هذا الحقد بين الدولتين حكومة وشعبا

لماذا وصلت مباراة لكرة القدم لغزوة ومعركة بين الاشقاء؟

السؤال الذي تردد في ذهني اكثر هو

لماذا لم يتولد هذا الحقد والكراهية الشديدة بين مصر والبرازيل اثناء كأس العالم للقارات؟

او بين مصر وكوت دي فوار في كاس الامم الافريقية ؟

لماذا عندما يلعب الاشقاء العرب مع بعضهم تتولد مشاعر الكراهية والبغضاءمابين الشعبين؟

السنا جميعا مسلمون ؟

السنا نصلي الخمس صلوات زي بعض؟

السنا نتجه لقبلة واحدة ؟

السنا نذهب للحج لا فرق بين مصري وجزائري وتونسي او سعودي؟

السنا جميعا نشهد ان لا اله الا الله وان محمد رسول الله ؟

اذن فلماذا كل ذلك

انها اللعبة الخبيثة لكرة القدم والقائمين عليها ومنظميها

هو الجامع الاقصي حصل فيه ايه؟؟؟؟؟

زوار ماتخافوش الاعزاء

انا اسف لابد ان اتوقف عن الكتابة عن الاتحاد وتزويره

لانه هناك ما هو اهم منه وهو

المسجد الاقصي

واوعي حد يفكر اني اخطأت لما كتبت في العنوان الجامع الاقصي

لاني مارضيتش اكتب

البيت الاقصي

زي ما واحد من زمايلنا في الكلية

كان بيسألني بيقوللي هو ايه اللي حصل في البيت الاقصي اللي هناك ده؟؟؟

بصراحة لم اصدم بسؤاله بقدر ما صدمت باللفظ

المهم جاوبته وقلتله علي اللي حصل يوم الاحد الماضي؟

وفي هذا اليوم دار في ذهني سؤالين واصبحت ابحث لهما عن اجابه

واسال زمايلي عن اجابة السؤالين وهما :

الاول ماذا سنفعل لو هدم الاقصي بزلزال او بالصواريخ اليهودية ؟؟؟؟؟

يا تري هل هانعيط

ولا هانشجب ونستنكر وندين

ونطالب باعادة بناء المسجد الاقصي وازالة الهيكل اليهودي الذي سيبنيه اليهود مكانه ؟

ام هل سنتظاهر

ولا هاندعي ربنا وخلاص ولا هانقول مالناش دعوه

والسؤال الثاني ماذا نفعل الان من اجل نصرة حقيقية للاقصي ؟

ومنتظر اجابات حضراتكو بجد

والمرة الجاية ان شاء الله

احكيلكو عن اللي حصل بسبب

تعليق صورة عن المسجد الاقصي في كليتنا

(هذه التدوينات هي سلسلة تدوينات من اجل الاقصي)

انا ماليش دعوه!!!!!!!!

باختصار شديد ذهبت الي عميد الكلية اشكو له عدم فتح باب الترشيح لانتخابات الاتحاد الطلابي

فقال لي باللفظ انا يا ابني ماليش دعوه بالاتحاد

قلت له طيب ما حضرتك اللي بتوقع علي تشكيل الاتحاد

فقال يا ابني الاتحاد ده بيتحكم فيه حاجات اكبر مني ومنك خليك يا ابني في حالك وفي مذاكرتك عشان تنجح وتعيش

فقلت له استاذنا يبدو ان الخطأ ليس خطأ الدولة او القانون

ولكن الخطأ هو خطأ هذا الجيل الذي ولد في مجتمع غير مستقيم

ومطلوب من هذا الجيل ان يكون في قمة الاستقامة

من الاخر يا سيادة العميد احنا اللي اتولدنا غلط

اذا كان رب البيت بالدف ضارب فشيمة اهل البيت كلهم..... الرقص!!!

نلتقي المرة القادمة مع

القصة الكاملة

للاتحادالطلابي

ومن يزوره بالاسماء عشان احنا قلنا لكم .....ماتخافوش

الرجل الاوحد؟؟؟؟؟!!!!

هي قصيدة كتبتها عندما كنت وراء الشمس

وتقول

ولدت بعصر لا يعرف*** سوي ذاك الرجل الاوحد

هموم الامة يحملها ***قد ظن بدنيانا قد اخلد

ان كان بشعب قد هم ***او غم برجل قد اقعد *

نادى: شعبي ان سلم ***ما نفع هتافك او تصمد

من ربع القرن احكمك*** من قبل شبابك ان تولد

قد كان لحكمي لك سمة*** في الحائط تمشي او تطرد

من تحته يمكنك العيش*** لكن ابدا لن تصعد

ان زل لسانك في كلمة ***من سيفي ابدا لن تنجد

لن اجني شيئا من قتلك ***وكذا عن ارضي لن تبعد

في سجني ذاك مقرك ***من بابه ابدا لن تخرج

فلن يجدي نفعا ابدا ***ان تزرع او حتي تحصد

لي ارض بلادي مجتمعه*** وجنودي في الارض لترصد

ابواب سجوني مفتوحة*** لمن يدعو لجهاد او يحقد

فالحكمة قولي فلتسمع*** وبنور كلامي فاسترشد

ولتعلم ! من سلمك يا ولدي ***لسلامة رأيي ان تحمد

ولولدي من بعدي ان سلم*** فهو خلفي ابدا الرجل الاوحد

...................

طبعا كلنا عارفين مين هو الرجل الاوحد (رئيس دولة قمعستان الديمقراطية)

*كلمة هم بضم الهاء والتشديد المفتوح للميم وكلمة اقعد بضم الالف مبنية للمجهول ومثلها في القصيدة كلمات تولد .تطرد.تنجد.تبعد.تخرج

معاك واسطة!!!!!!!!

من منا لم يستخدم الواسطة و لو لمرة واحدة فى حياته ؟

من منا توقفت مصالحه او تبددت احلامه لانه لم يجد الواسطة ؟

كيف اصبح الظلم هو اساس المعاملات .. و الواسطة و المحسوبية هى طريقة المعاملات ؟!

فكل شىء فى هذا البلد اصبح يسير بالواسطة او الكوسة مهما كبرت او صغرت .. او مهما كانت مهمة او تافهة .. و مهما كثرت الكفاءات و مهما قلت الامكانيات ..

فأنت بحاجة الى الواسطة من المهد الى اللحد ! ...

لتدخل المدرسة .. لتدخل كلية عسكرية او شرطية .. لتعالج فى المستشفى .. لتنهى مصالحك المعلقة .. لتتهرب من التزاماتك .. لكى تستخرج رخصة قيادة .. لتسافر .. لتأخذ حقك ..لكى تعمل .. لكى تبنى .. لكى تزرع ..لكى تموت بشرف !


فاعلم ايها المواطن هذا المبدأ و احفظه جيدا :

((في الوطن العربي انت بلا واسطة ... اذن انت لا شىء ))!

................................

بصراحة الكلام اللي فوق منقول من احد المواقع الالكترونية بس انا عاوز اسأل سؤال هل فعلا الواسطة ليها جانب كبير قوي كده في

حياتنا .انا هاجاوب برأيي وعاوز اشوف ارائكم ايه

- واحد صاحبي كان مقدم أوراقه في اكاديمية بحرية في اسكندرية ووالده عميد جيش وبعد بداية الدراسة بشهر ونص تقريبا ومع بداية

امتحانات الميد تيرم اصيب في حادث وفوجئت لقيته محول اوراقه كلية سياسة واقتصاد بعد ما مواعيد التحويل خلصت من

زماااااااااااااااااااااان باسأله قاللي ايه يا عم ابويا عميد عاوز ايه تاني !!!!!!!!

- كنت عاوز اجيب عيش من الفرن وواقف في الطابور وكل شوية واحد ييجي ياخد عيش من بره الطابور نقول يا جماعه مين ده يردوا

يقولولك دا معاه واسطه وله معرفه في الفرن

- احد اصدقائي الاعزاء كان عاوز يطلع رخصه قيادة من مرور ديرب نجم ولكن الاجراءات طويلة فذهب لاحد الاشخاص خلص له الرخصه في ساعه الا ربع.

- اخويا الصغير كان بيروح المعهد الابتدائي في قرية بعيده عن مكان السكن وكنا عاوزين ننقله للمعهد المجاور لنا ذهبنا لناظر المعهد

فقال مافيش مكان سلمنا وقلنا ماشي جه واحد صاحبي والده مفتش في الازهر قاللي هات الورق وانا اخلصه لك وقد كان !!!؟؟؟؟

- اذا اردت ان تدخل كلية من الكليات العسكرية او النيابة فالتسعيرة معروفه في مكتب الوزير كمال الشاذلي في الباجور ومكاتب بعض

المستشارين والرتب في الجيش والشرطة

وغيره كتير كتير.... اذن .. قالحياة بدون واسطة تبدو حياة قاتله

منتظر ارائكم وللا اجيب ليكو واسطه؟؟؟؟؟؟؟؟؟؟؟

أكـــاذيب محمد علي ابراهيم..!!!!

قرائي الاعزاء

البوست ده بوست مخصوص شويتين وانا هاكتب اللي شفته وعليكم انتم الحكم والتعليق

قصة البوست ده تبدأ مع برنامج الوجه الاخر للاعلامي احمد شوبير علي تلفزيون الحياة


استضاف فيه الكاتب الصحفي محمد علي ابراهيم رئيس تحرير الاهرام وعضو مجلس الشوري بالتعيين


سأله شوبير عن
1- سبب العداء القوي بينه وبين حماس او بالنص بين الصحف القومية وبين حماس وقطر فرد الرجل وبكل صفاقه
لان حماس وقطر هما من تعاديان مصر وتروجان الاشاعات الكاذبة ان مصر تغلق المعابر وتشارك في حصار غزة وهذا كذب وافتراء علي دور مصر العظيم في رفع الحصار عن غزة (ده كلام محمد علي ابراهيم ونسي هدم الانفاق وضبط المواد التموينية وفساد الاغذية في العريش حوالي 2000طن ومنع مظاهرات التضامن مع غزة)
2- سأله شوبير عن سبب معاداته للاخوان فأجاب
لان الاخوان عايزين يمسكوا الحكم ويقيموا دولة دينية ودي ما تنفعش في مصر وبعدين الاخوان لهم اتصالات بايران وبامريكا وباليهود نفسهم ولا يعملوا لمصلحة مصر كما ان لهم تمويل اجنبي غير معلوم(ونسي المحاكمات العسكرية للاخوان ومصادرة اموالهم ورفض الاخوان لقاء السفير الامريكي ولم يقدم دليلا واحدا علي علاقتهم بامريكا او بايران او اليهود وهو امر مضحك للغاية)

3- ساله شوبير لماذا ترفض ربط الدين بالحكم

قال لان ربط الدين بالحكم يؤدي الي ادخال انف الدين في كل شئ في الحياة يبقي كده المسيحيين مش هايخدوا حقهم وكل واحد هايسرق هاتتقطع ايده واللي هاتلبس بنطلون هاتتجلد ودا ما ينفعش في مصر لان كل الدول تقدي بمصر فمصر بلد التقدم والرقي لكل الدول(ونسي ان الاسلام كفل للناس جميعا حقوقهم مسلمهم وغيره ومن قال ان من تمشي في الشارع ببنطلون هاتتجلد الم يسمع قوله تعالي" انك لا تهدي من احببت ولكن الله يهدي من يشاء وهو اعلم بالمهتدين" ثم ان الاخوان يطالبون بدولة مدنية ذات مرجعيه اسلامية ثم من قال ان مصر قدوة للدول كلها في التقدم والرقي اين يوجد التقدم والرقي في مصر في المواصلات المتهالكة ام في المستشفيات التي لا توجد بها خيوط الجراحة ام في فساد زراعة القطن ولا ايه ولا ايه وعجبي)

4- سأله شوبير عن رايه في جمال مبارك ؟

هرب من السؤال الي الحزب الوطني والتمنية الاجتماعيه وفي النهايه قال وايه يعني لما يمسك الحكم ؟؟؟؟؟؟؟؟؟!!!!!!!!!!!!

5- ساله شوبير عن برنامج الحزب الوطني

فقال ده برنامج تنمية وعداله اجتماعيه ( ونسي قلعة الكبش والدويقه وعزبة بلال وممدوح اسماعيل الهارب واحمد عز وغيره)

6- ساله شوبير عن الرئيس مبارك ؟

فقال دا بطل الحرب والسلام وبطل التنمية والعدالة الاجتماعية ولا يوجد احد يستطيع حكم مصر مثله ولم ياتي رئيس مثله واذا ترشح المرة القادمه ساؤيده للابد

7- ساله شوبير عن سبب الاضرابات المنتشرة في كل مكان

فقال ان سببها ضعف الحياة السياسية ( ونسي ان الناس لما بتعمل اضراب بتكون عاوزه زيادة في المرتبات عشان تاكل عيش يعني من الاخر الناس بتعمل اضراب عشان عاوزه تاكل مش تحارب الدولة)

..................

عند نهاية الحوار عرفت لماذا تم تغيير القيادات الصحفيه وتركوا محمد علي ابراهيم رئيسا لتحرير الجمهورية
......................
عجبي عليكي يابلدي ***فيكي حاجه محيراني
نزرع القمح في سنين ***تطلع الكوسة في ثواني
الي اللقاء في البوست القادم

صلاة العيد........ حرام !!!!!!!!

اولا كل عام وانتم بخير بمناسبة عيد الفطر السعيد واللهم اعده علينا بالخير واليمن والبركات
وعلي فكره تشرفت بزيارة والدي الكريم للمدونة وابدي اعجابه بها وبتعليقات زوارها واصر علي عمل كوباية شاي اثناء كتابة هذا البوست وما ادراكم يعني ايه كوباية شاي من بابا

ثانيا انا كنت ناوي اكتب بوست عن موضوع تاني خالص غير ده

بس التطورات اللي حصلت امبارح هي اللي اضطرتني اني اكتب البوست ده

بصراحه عنوان البوست ده مش حكم فقهي ولكن مقولة قالها رئيس مباحث ديرب نجم امبارح في صلاة العيد

الموضوع يتلخص في المشاهد التالية

المشهد الاول

كعادة كل عام من 25سنه بدأ الاخوان في ديرب نجم صباح يوم العيد بعد صلاة الفجر في تنظيم مسيرة العيد التي يشارك فيها حوالي 2000 شخص في المتوسط من الرجال والشباب والاطفال ويكون فيها تكبير العيد وتمشي المسيرة في الطريق المؤدي الي مصلي العيد في فرح وسرور من الجميع

المشهد الثاني

عند بدأ المسيرة في التحرك وصل الي المكان رئيس مباحث ديرب نجم ومامور المركز وتشكيل من جنود الامن المركزي بسياراته ومندوب امن الدولة وظباط المباحث والمخبرين وبدأوا الحديث مع قيادات الاخوان عن منع المسيرة نهائيا ( يعني ما فيش مسيرة خالص)

المشهد الثالث

رد الاخوان كان برفض هذا الامر وان المسيرة ستتم فما كان من رئيس المباحث الا ان قال خلاص مافيش صلاة عيد خالص فقال الاخوان خلاص هانصلي العيد في الشارع ومن الاخر وليمنعونا ان كانوا فاعلين

المشهد الرابع

عندما وجد رئيس المباحث نفسه في مأزق بدأ يتفاوض واتفقوا علي سير الناس ولكن بدون لافتات التهنئة وبعد الحاح كبير وتفاوض صعب وافق الاخوان وعند بدأ الناس في المسير رفض طرف ثالث المسيره والناس بالكلية وقال لا مافيش مسيرة ولا صلاة عيد وكان هذا الطرف هو ................قمل الدولة

المشهد الخامس

عند ذلك بدأت مفاوضات اخري حتي لا يصل الامر الي الصدام والاعتقالات وحتي يمر اليوم بسهولة وحينها ظل رئيس المباحث يقول مافيش صلاة عيد وصلاة العيد انهارده ...................حرام !!!!!

المشهد السادس

بعد مفاوضات ثانية عرض الاخوان علي الاجهزة الامنية ان يمشي الاخوان كل خمسة او عشرة مع بعض ووافق الامن وحين بدأنا المسير اعترض الطرف الثالث وقال لا ما فيش حد هايمشي ولكن كان للناس راي اخر

المشهد السابع

بدأ الناس في المسير ولم يسمعوا للامن كلاما وحينها حاول الامن اعتقال البعض ولكنه فشل وبدأ الناس في الجري في الشارع وتخيلوا 2000شخص بيجروا في الشارع عرضه 15 متروطوله 400متر يبقي شكلهم عامل ازاي مع التكبيروتلاحم الشعب وتعاطفه معهم ضد قوات الامن التي تريد مضيعة فرحة العيد علي الناس

المشهد الثامن

الامن يحاول السيطرة علي الجماهير الثائرة ويحاول تطويقها بسيارات الامن المركزي ولكن الناس تلتف حول السيارات وتمشي ويتجمعون مرة اخري ويواصلون المسير في جماعه والتكبير مستمر لحين الوصول الي المصلي

......................

في النهاية اريد ان اوضح معلومة بسيطة ان هذه المشاهد لا توجد الا في دولة قمعستان الديمقراطيه حيث هناك

الديمقراطية لها .....انياب

وكل عام وانتم بخير

والي اللقاء في البوست القادم بعنوان ........ اكاذيب محمد علي ابراهيم

انا بحب النظام

طبعا اول ما هاتقروا العنوان هاتقولوا اوبح ابراهيم اتهدد من ظابط قمل الدولة اللي رد عليه في البوست اللي فات وقرر انه يحب النظام ويمشي مع النظام وينادي ليل نهار بالنظام وطبعا يا جماعه انا باقوللكوا ان قصدي بالنظام مش النظام اللي بالي بالكم ( يعني الحكومة وحسني ورجالته ) لا ان قصدي النظام بالمعني التاني يعني الحياة المرتبة يعني كل واحد عارف هو عليه ايه وليه ايه ؟ يعني كل واحد في عمله يتقنه ويكون منظم فيه .
وبصراحه شديدة اللي خلاني اكتب البوست ده مواقف حدثت معي اليوم وانا امشي في الشارع كان الطريق زحمة وانا ماشي علي رجلي انا والحاج والدي والسيارات تسير في اتجاه واحد والاتجاه التاني سياراته بسيطة بصيت فجأة لقيت عربية طالعه من الطابور اللي السيارات ماشيه فيه وداخله علي المشاه ونظرات السواق بتقول لنا وسعوا لحسن افرمكوا ااااااه انا اللي راكب عربية يبقي امشي في المكان اللي عاوزه
طبعا لما السواق عمل كده الطريق اللي كانت سياراته بسيطة اتملا سيارات ووقف الطريق خاااااااااااالص وظل السواق واقف وكأن الناس كلها غلطانه وهو الصح ده يقول له ارجع يا اسطي الطابور وده ولا هو هنا .............. طبعا هذا الموقف متروك التعليق فيه لحضراتكم

الموقف الثاني

راجع من المسجد ركبت السرفيس انا واحد اعضاء تنظيم البلالين وساكتين علي اساس ان السواق هايمشي في خط سيره تمام بصينا لقينا السواق ماشي دوغري يعني علي طول ايه يا اسطي انت مش داخ المساكن ولا ايه ( دا انا اللي باقول للسواق) لا يا بيه ما بندخلش المساكن من بعد العصر ( دا السواق اللي بيقول) يااسطي مش خطك ان انت تخش المساكن ..... لا يا بيه مش داخل ......... يا اسطي مش ده نظام وشغال انت ما بتحبش النظام ولا ايه ....... يللا يا بيه هاتيجي الموقف ولا تنزل ...... لا يا اسطي مش نازل وارجع علي المركز ( يعني قسم الشرطة) ....... لا مش راجع عندك نمرة العربية اهيه خدها واعمل اللي نفسك فيه ..... يعني ايه مش همك ........ ما قلتلك روح والنمرة معاك لوزير الداخليه نفسه ورينا هاتعمل ايه ؟؟؟؟؟؟؟؟ وفرد السواق عضلاته علينا وكأن مافيش حد هايقدر عليه واعلي ما في خيلك اركبه يا عنتر . في هذا الوقت الركاب ساكتين وفي الاخر نزلوا يمشوا وكأن الموضوع لا يعنيهم
.....
الي هذه الدرجه اصبحنا شعب لا يحب النظام بل ويكره النظام لانه في احيان النظام العام يعتبره البعض يهدر حقوقهم الشخصية ويظلمهم


طبعا هذان الموقفان بعض من كل ومثال لا حصر . بجد عاوز حد يفهمني ليه بنكره النظام؟؟؟؟؟؟؟؟؟

الحياة بأوامر قمل الدولة

جاءت انفلوانزا الخنازير علي الطبطاب لجهاز قمل الدولة عشان يقول للناس مافيش اعتكاف ومافيش صلاة تهجد وممكن يكون بيستعد انه يقول لهم مافيش صلاة عيد في تجمعات دا بعد منع اقام الموالد ولكنه لما وجد ان فيه طائفة من الشعب هاتثور عليه وهاتصحي من نومها وهي طائفة الدراويش اللي ما يعرفوش غير اكل الفتة وهز الراس طول الليل قولة الله حي وأذكر الله.

الناس دي طبعا ما لهاش في سياسة ولا في اخبار فلسطين ولا غزة ولا عراق ولا غيره قمل الدولة يقول يمين يقولوا ماشي يقول شمال يقولوا أينعم طبعا مش موضوعنا الجماعه دي ولكن الاهم هو السؤال لحد امتي هايتدخل قمل الدولة ويفضل يقرص فينا ويخلينا مش عارفين نصلي ولا حتي ننام؟

مش ملاحظين حاجه . ان قمل الدولة بيتدخل في كل شئ تعالوا نشوف

1- قمل الدولة يتدخل في انتخابات الاتحادات الطلابية في الجامعات حتي يتم تظبيط القوائم زي ما كلنا عارفين.

2- قمل الدولة يتدخل في تعيين المعيدين في الجامعات حتي يمنع الناس اللي بالي بالك من الوصول لمناصب قيادية ودولية زي الدكتور عبد المنعم ابو الفتوح وزي الدكتور خالد عبد القادر عودة والدكتور جمال عبدالسلام .

3- قمل الدولة يتدخل في شئون المساجد والاوقاف وتعيين الخطباء ومواضيع الخطب والدروس وكذلك تنقلات الائمة والعلماء

4- قمل الدولة يتدخل في ترقيات الموظفين الحكوميين والمدرسين و تنقلاتهم واماكن عملهم وآدى عينة

5- قمل الدولة يتدخل في المواقع الالكترونية والدونات ويحظر ويعتقل ويراقب ويحجب كل شئ يتدخل في منطقة واحدة محظورة جدا جدا الا وهي قصر الرئاسة

6- قمل الدولة يتدخل في انشاء وتكوين الاحزاب السياسية وكذلك يتلاعب ويزور نتائج الانتخابات الشعبية والشورية والمحلية ودي مش محتاجه دليل لانها باينه للجميع

7- قمل الدولة يصادر الممتلكات والشركات والاموال الخاصة بالمعارضين اللي احنا عارفينهم كويس بدعوي انهم استخدموها في غسيل الاموال وانهم تلقوها من جهات اجنبية لمحاولة زعزعة الاستقرار وقلب نظام الحكم و عندك دليل كبيييييييييير اسمه المحاكم العسكرية لقيادات الاخوان

8- قمل الدولة يقوم بغلق المدارس الاسلامية الناجحة وكذلك الجمعيات الاهلية الخدمية والنقابات الرسمية لان بعض اعضائها من المعارضين للنظام زي مدرسة الجزيرة بالاسكندرية ونقابة المهندسين

.....................

يعني من الاخر لو بصيت حواليك هاتلاقي قمل الدولة بيقرص فيك من كل حته ... اذن فلن تتحرك ولن تتكلم ولن تاكل ولن تشرب ولن تتنفس ولن تتبو... ولن تتبر... ولن تتزو... ولن ( اي حاجه في الدنيا ) الا بباوامر قمل الدولة يعني من الاخر ..لا حياة بدون قمل

...............

الاستنتاج:

يفضل استعمال ليسيد لوسيون للقضاء علي القمل

قل عهد واتفاق ولا تقل عقد اتفاق

بسم الله الرحمن الرحيم

اسمحوا لي يا زوارنا ان اكتب هذا البوست ليكون عقد اتفاق فيما بيننا

سنتفق فيه علي سياساتنا في هذه المدونة

التي ان شاء الله ستكون بوابة الناس جميعا ليقولوا لا للخوف ونقول نحن لهم

اتكلموا و..............ماتخافوش

بداية أحب ان انوه علي شئ مهم وهو

ان كل الناس يمكنهم التدوين في هذه المدونة طالما ان التدوين تتفق مع السياسة العامة للمدونة ومطابقة للشروط التي سنذكرها الان

1- تدويناتنا غالبا ما ستكون اسبوعية قدر الامكان الا اذا جد جديد أو حدث حادث يستدعي منا الكتابة عنه خلال الاسبوع

2- لكل تدوينة موضوعها المستقل بذاتها الا اذا بدأنا سلسة موضوعات فمن الممكن استكمالها متتابعه او متفرقة

3- تدويناتنا ستكون فيما يهتم به الناس وما يهمهم وبدون تتطاول علي الذات الالهية او الانبياء او الصحابة ابدا

4-لا حدود لحريتنا فحريتنا بلا حدود لا احد يمكنه ان يخرس ألسنتنا أبدا ما دامت تنطق بالحق

5- سياستنا في هذه المدونة هي النقد البناءدون تجريح شخصي وكلامنا ان شاء الله سيكون موضوعيا بعيدا عن الشخصنة والشعارات

الجوفاء

6- لكل القراء والزوار الحق في التعليق المحترم علي كل التدوينات وله ايضا حق الاضافة بشرط عدم السب او القذف في اي فرد كائنا من

كان

7- هدفنا في هذه المدونة هو ان نقول للناس قولوا كلمة الحق دائما و......ماتخافوش

البداية

بسم الله الرحمن الرحيم

زوارنا الاعزاء

دا أول بوست في مدونتي الجديدة

ماتخافوش

واللي هانتكلم فيها عن كل شئ مش مظبوط في بلدنا

وكمان هانتكلم عن كل شئ كويس

واي حد ايجابي

وكل الناس السلبية ...... هانفضح الفساد...

وهانقول للغلط لأ ...

وهانصلحه..

هانكتب عن كل شئ

وبحرية تامة ..

سنقول للخوف لا

وسنقول لكل الخوافين .....

ماتخافوش